居日的難處及陷阱位
首先多謝大家對我呢個 topic 有興趣，不如等我簡單講講自己嘅背景先。最初我係喺2014年嘅時候，受僱過日本工作，當時請我嘅老闆係一個香港人，而佢就請我過去大阪幫佢打理幾間apartment 民宿。果時其實我係一句日文都唔識嘅，因為我做嘅野只係負責安排執房同埋接待香港台灣嘅遊客。但因為我嘅屋企人同埋我嘅仔女都係香港，所以嗰時係日本香港兩邊飛。
直到2018年，日本嘅民泊條例收緊，老闆就賣曬佢嘅apartment 民宿，轉咗開餐廳，而我就返咗香港。之後睇到香港嘅轉變，我先生當機立斷話不如帶埋三個仔女離開香港。當時我哋考慮咗好多東南亞地方，但係因為想方便探親，所以就揀咗日本。做咗呢個決定之後，我就的起心肝係香港報咗日文課程學咗半年日文，亦都開始去搵資料研究點樣申請經營管理簽證。
當時去過聽一啲日本樓盤嘅講座，其中一間係喺尖沙咀成日賣廣告嗰間，佢哋亦都有移居申請簽證嘅package，睇完個報價之後，加加埋埋要成30到40萬港紙，價錢非常之貴 (我覺得啦)。之後又見到東京粥舖嘅廣告，聯絡佢哋之後，淨係聽個講座都要一千蚊港紙入場費，當時覺得佢一定係食粥食懵咗。最後決定自己準備申請，我將我地既營商 idea 交左比一個香港做開生意既朋友寫成專業的計劃書，再自己搵日本嘅行政書士申請。當時申請簽證都仲係比較容易，我哋係以民宿管理去申請，因為我哋賣咗香港層樓之後，就用嗰筆錢買咗三間細細地平平地嘅一戶建去改裝申請去做旅館。由於之前已經有民宿管理經驗同埋自己喺日本嘅物業 (註：呢個絕對唔係令簽證申請成功嘅因素，唔好聽人講買樓或者投資民宿就可以成功申請簽證)，我哋嘅簽證大概兩個月就批咗出嚟，而又好好彩喺武漢肺炎爆發封關之前，我哋就已經全家入境處咗喺日本生活。
根據我第一身經歷，由準備申請至岩岩到日本，最易中招有兩個位，第一個係申請簽證時好易洗多左冤枉錢，第二個中招位係初到貴境時信錯 "朋友"，最壞情況可能會比人呃晒全副身家都唔奇。
咁到底，咩情況下會係第一個中招位洗多左冤枉錢? 到底而家手上果份移居套餐的報價合唔合理? 點樣可以用平dd既方法靠自己去申請簽證呢? 遇到咩人一定一定一定要提高警覺? 下一篇會交代。
... 待續
參與此話題的討論請到 << 居日的難處及陷阱位 (上) >> 或按此 "直接查詢"