居日的難處及陷阱位
上次講到我地一到埗就遇到個熱心的香港人，點知都係為左賺我地錢，想我地用天價幫襯佢介紹的公司搞裝修及無啦啦要租多個office，一租就一年使多左成90萬。。。自此之後我地對所謂 "同鄉" 都好有戒心，就算之前知道大阪有其他blogger或者香港人，我地都無特登約出黎傾計見面，因為諗諗下我地明白，大家做緊自己生意，都要為簽證跑數，就算唔係有心呃人，背後多多少少想你有野幫襯佢，邊有咁多真心朋友。
久而久之，我地的生活圈子已經變左主要同日本人做朋友，亦識到一班真心想幫香港人的日本人，其中一位曾經講過，佢好想幫香港人但唔知有咩可以做，結果有一日，佢問我先生想唔想返工，可以去佢公司度返part-time，人工仲比其他本地人高dd。其實我地又唔係等part-time份糧開飯，不過可以擴闊圈子又可以了解更多日本文化，所以就接受咗個位日本人既好意，去佢度返工。其實我先生係唔太識日文嘅，所以你諗下，果位日本人係要幾大嘅勇氣先可以決定請我先生去返工。
講返生活上會遇到的難題，一來到日本當然就要租屋先，但係日本好奇怪嘅，如果你嘅在留卡上面本身係冇登記地址嘅話，其實係好難會租到屋嘅，但係我租唔到屋，又點會有個登記地址呢?? 而且外國人好多時都要有日本人做擔保人，就算搵保證公司，佢都係要你有個日本人做擔保，咁我做乜要搵保證公司呢?? 有少數嘅樓盤會接受冇保證人嘅外國人去租住，當然價錢就會比較貴。
搵屋時我哋已經係用日文去聯絡地產經紀，但係佢哋知道你係外國人之後，就會用好多唔同嘅藉口去打發你，例如話呢間屋已經有人睇中咗，如果佢放棄我哋就通知你啦。結果間屋兩個月後我哋都見到佢係丟空咗喺度。又或者明明個盤係一出我哋已經打去問，但係佢就話我哋係排第二，又要等第一位cancel先至有得睇。
當然，呢d都係藉口嚟。睇到有一間，唔使保證人，價錢又負擔到，我哋就乜都唔理租鬼咗佢，總算解決咗其中一個難題。租到屋之後，第一樣要做嘅就係去役所度登記地址，登記完先至可以有福利同埋有書讀。但係職員多數都係唔識英文嘅，如果好彩嘅話可能會有的識英文嘅員工或者會有翻譯機，如果都冇就你自己諗掂佢。。。所以大家一定一定要學少少日文先好黎。跟住就到電話卡，喺日本出電話卡好多時要有日本嘅信用卡，而香港嘅信用卡或者日本嘅debit card 都係開唔到電話卡嘅，但係經營管理簽證因為係做自己嘅生意，其實係好難開得到信用卡嘅，如果打工嘅可能會更加容易。
我哋不斷試，終於試到有一間公司可以用我哋其中一張香港嘅信用卡去登記，所以唔好問我點樣搞電話卡，你要從嗰幾間電話公司同埋你自己嘅信用卡果七七四十九個組合，試到開到為止咁你就成功咗喇。然後就去開銀行戶口，個人戶口都唔太難開，但係同樣要用日文去溝通，至於法人戶口，基本上同香港一樣，係非常，十分，嚴重地難開，我哋等咗兩個禮拜之後佢通知我哋，因為我哋喺日本未有正式嘅生意，所以佢開唔到個法人戶口畀我哋。但係我冇法人戶口，我又點樣喺日本做生意同收錢呀??? 結果我哋開咗個網上銀行戶口用住先，呢樣會比較容易批。但網上銀行唔方便就係因為佢冇分行，好多嘢冇得當面去辦理，要靠日文打電話去問。
仲有好多古靈精怪你理解唔到嘅事情，有機會再講。希望大家睇完之後幫手like and share出去各大平台及討論區，等大家有個心理準備將來會遇到嘅奇怪事情。
參與此話題的討論請到 << 居日的難處及陷阱位 (下) >> 或按此 "直接查詢"