居日的難處及陷阱位
上回講到申請簽證時好易使多左冤枉錢，例如聽完d免費講座，比人sell埋d移居package，講緊三四十萬起跳，仲未計投資果part，當然錢多又唔想煩咪用錢解決囉，不過多數comment 都係話呢d 買樓買民宿移居既公司唔太理申請簽證果part，交完資料就算，好彩就批出簽證，唔好彩簽證被拒的話咁點? 層樓又買左，人又過唔到去，又或者續簽時有問題，關人鬼事囉。
而家上網咁多資料，最平當然係自己直接揾日本的行政書士申請，就算係香港唔飛去日本一樣可以開公司同申請簽證，我當年都係咁做。不過多數行政書士本身只識日文同埋唔會幫你寫計劃書，最多只會就你既計劃書比意見修改。假設要申請一年的經營管理簽證，我建議準備好計劃書先租office同成立公司，因為無經驗的話計劃書分分鐘磨兩三個月都未寫好，如果一早已租office就會白交租。
計劃書寫好後就可以開始租office，呢個係其中一個難位，因為無居留身份又無保證人，只可以租一d 超迷你office，但注意要有獨立門牌才可用來申請簽證。租到office後就可以註冊公司。公司約兩三星期後註冊好就可以入紙申請簽證。
以上呢堆野都可以找移居日本的秘密 by 阿水替你在日本辦理，之後雖然就係等結果，快則兩個月慢則半年，但呢個時候會超忙，因為要開始搞搬屋同寵物移民 (要半年檢疫，請提早安排)，批出在留資格證明書 coe 後就要申請visa book 住宿book機票辭職退學做pcr... 呢d唔講太多喇，網上已經好多資料。
一跳到跳到去日本，講第一個比香港人呃既經歷。當年我地到埗係暫住自己間民宿，再揾agent租屋，果時識到個香港人就話自己識好多不動產中介，又車我地揾屋，之後傾開知我地買左呢間一戶建打算改裝做民宿，就話幫我地揾d裝修公司報價，一睇，真係唔熟唔食，天價黎，因為本身屋企人中係香港開裝修公司，d報價單都係我收工幫佢整既，所以大約都知咩價位，例如香港10萬港紙既野，去到日本點都唔會變左500幾萬日元啩? 結果我地自己揾另一間日本公司報價，足足平左一半！個香港人見呢單無得食之後，就同我地講，民宿要黎做生意，住左人咁點做office? 要另外租個office先可以續到簽證架，當時傻下傻下又好怕第一年就續唔到簽證，所以就幫佢租左個半坪的office仔，要六萬幾日元一個月，但之後發覺其他單位只係需要5萬日元就租到，比完佣仲要比人食差價，之後諗返，其實民宿塊地係我既，加個office咪得囉！自此之後個香港人成日話有人頂讓生意，筍野黎又盛，我地都無再理過佢。我仲未講完 ! 待續。。。
參與此話題的討論請到 << 居日的難處及陷阱位 (上... 之下) >> 或按此 "直接查詢"